Jesús Carnota

Nado na Coruña en 1979. Creativo publicitario e deseñador dende 1998, ano no que comeza os seus estudos de Publicidade e Relacións Públicas na súa cidade natal. Ao rematar os seus estudos vaise a Barcelona, onde empeza a traballar como creativo e deseñador tanto para axencias de publicidade como autónomo. Tres anos despois volve á Coruña, onde reside actualmente.
Dende que empezou a súa traxectoria laboral, pasou por diversas axencias de publicidade e realizado traballos para grandes empresas nacionais e internacionais como Inditex, Schweppes, Caixanova ou TVG.
Colabora con Semilla para el Cambio como deseñador e creativo publicitario.

Natalia Verea

De orixe galega, reside en Valladolid. É licenciada en Filoloxía Hispánica pola Universidade da Coruña e diplomada en Ciencias Relixiosas pola Universidade de Navarra. Dende os anos de vida universitaria participou activamente na organización de actividades culturais e de acción social promovidas pola Universidade da Coruña, a ONG Cooperación Internacional ou a Asociación Terral. Actualmente exerce como profesora de Lingua e Literatura Castelá no Colexio Alcazarén onde trata de contaxiar aos seus alumnos o interese pola cultura e de fomentar a súa participación en actividades solidarias.
Colabora con Semilla para el Cambio en edición de textos e organización de eventos en Valladolid.

Ana López

Nace en Lugo o 16 de novembro de 1975. É licenciada en Ciencias Políticas e Máster en Medios de Comunicación. Dende o ano 2000 dedícase ao xornalismo e traballa en distintos medios, editoriais e axencias. A través do seu traballo como correspondente da revista Escuela e as súas viaxes por países de Latinoamérica, entrando en contacto con diversos colectivos implicados na educación para o desenvolvemento. Esta experiencia sensibilízaa coa importancia da escolarización para o futuro dos máis desfavorecidos. Colabora con Semilla para el Cambio no Departamento de Comunicación.

“Semilla é unha aposta pola solidariedade, pola igualdade de oportunidades, por crear xustiza nun mundo de inxustizas… por crer firmemente que, se nos empeñamos, podemos cambiar as cousas“.

Iris Tarrío

Orixinaria de Narón, actualmente reside na Coruña. A súa inclinación cara á creatividade lévaa a estudar Publicidade e RRPP en Pontevedra, e a interesarse polo mundo do deseño gráfico. Tras licenciarse, traballa no Departamento de Publicidade dunha editorial coruñesa con varias cabeceiras de prensa local. En 2008 completa a súa formación cun Máster en Dirección de Comunicación Empresarial e Institucional pola UAB.

Consciente do papel primordial que a comunicación entraña para toda organización, decide unirse a Semilla para el Cambio para comunicar e sensibilizar sobre o labor da ONG en Benarés.

María Bodelón

Nada na Coruña en 1977, orixinalmente gradúase en Filoloxía Inglesa. Vive 9 anos no Reino Unido, onde estuda un MBA e un Máster en Informática subvencionado pola Obra Social de Caixa Galicia. Traballa no Departamento de Finanzas de British American Tobacco durante 5 anos.

En 2008 decide dar un xiro á súa vida, matriculándose nun Máster en Cooperación en IDS (Institute of Development Studies, Brighton). Seguidamente embárcase nunha viaxe en solitario por Oriente Medio e Asia, ao final do cal decide fundar e impulsar o proxecto educativo de Semilla para el Cambio, para mellorar o futuro de nenos en eidos de extrema pobreza na India.

Jordi Serra e Sheila Ferrer

Nados en Gironella (Barcelona) en 1976 e 1978 respectivamente, levan compaxinando unha década as súas profesións de enxeñeiro informático e xeógrafa, coa súa paixón por viaxar.

O seu desexo de traballar para os máis desfavorecidos nos países do Sur, onde tan incondicionalmente foran acollidos durante as súas viaxes, anímaos a formarse en Cooperación Internacional coa Cruz Vermella. A principios de 2011 aparcan a súa mochila en Varanasi, dende onde xestionan os proxectos de Semilla para el Cambio.