Tras completar os meus estudos de Cooperación en Inglaterra, decidín embarcarme nunha experiencia que marcaría un antes e un despois na miña vida: unha viaxe en solitario por Asia. India representou para min un gran choque emocional. Vendo tantos nenos e nenas despoxados dunha infancia, obrigados a colaborar co traballo familiar sen máis esperanza cá dunha mísera subsistencia, sentín unha ‘chamada’ á acción.

Uns meses máis tarde fundei Semilla para el Cambio co obxectivo de brindar un futuro digno para estes nenos, apostando por unha educación de calidade como medio para romper a espiral de pobreza e lograr o seu pleno desenvolvemento. Xa dicía Kennedy que a infancia é o recurso e a esperanza para o futuro. Se os axudamos a valerse por si mesmos, estaremos a contribuír activamente a que miren ao futuro con esperanza.

En Benarés, pouco a pouco, o proxecto inaugural de Semilla foi collendo forma: no primeiro curso académico, escolarizáronse dezaoito nenos e nenas dentro dun programa educativo integral que lles proporciona ferramentas para afrontar os retos do mercado laboral e promove a inclusión social.

Dende aqueles modestos comezos, un número cada vez maior de colaboradores estanse a ilusionar e comprometer co noso proxecto. As perspectivas son alentadoras: proximamente estaremos en condicións de ampliar a nosa cobertura a outros ámbitos (nutrición e saúde) e aumentar o número de beneficiarios, brindando a posibilidade dun futuro mellor a un número meirande de nenos.

Grazas por interesarte polo noso labor, que non sería posible sen a solidariedade e colaboración de todos os que, coma ti, cren en sementar a esperanza e o cambio. Nas túas mans está unirte á nosa causa e xuntos transformar, día tras día, a vida de nenos e nenas pobres en Benarés.