Que facemos >> Onde estamos

O único país no que actualmente desenvolvemos o noso labor de cooperación é a India, centrando o noso foco de actuación na cidade de Benarés.

A India é o segundo país máis poboado do mundo. Alberga máis de 1.000 millóns de habitantes, e a pesar de ser o décimo país máis industrializado, concentra o maior número de pobres do planeta (estímase que uns 330 millóns viven por debaixo do límite da pobreza). Existen grandes desigualdades sociais, acentuadas polas graves deficiencias que sofre a prestación de servizos básicos.

Na India, a sanidade e a educación non son gratuítas e resultan inalcanzables para millóns de familias. A estes nenos, sen unha educación e coas escasas forzas que lles proporciona unha deficiente alimentación, só lles queda traballar en penosas condicións dende moi pequenos, abocados a unha mísera subsistencia.

Benarés

Benarés é un dos principais centros de peregrinación da India, onde acoden os crentes hindús para esparexer as cinzas dos seus defuntos nas augas do sagrado río Ganxes, coa seguridade de que así completan o ciclo de reencarnacións.

Benarés encóntrase no estado de Uttar Pradesh, unha das rexións máis atrasadas e superpoboadas do país. Como moitas outras cidades da India, alberga miles de emigrantes que chegan fuxindo da pobreza rural e acaban vivindo en choupanas en condicións de absoluta insalubridade.

Os distritos de Bazaar Biha e Nagwa, entre outros, concentran gran número de familias pouco avantaxadas econonicamente e socialmente, pertencentes aos ‘dalits’ ou intocables.

Aínda que a constitución india de 1950 prohibe a exclusión de castas, a gran maioría dos pobres e analfabetos en India pertencen ás castas máis baixas, que a día de hoxe continúan sufrindo discriminacións de todo tipo. Estas comunidades marxinais de intocables, que segundo a relixión hindú son impuras de nacemento, con frecuencia viven en condicións pouco dignas e se dedican a ocupacións tradicionalmente consideradas denigrantes (traballos que implican un contacto físico con refugallos, excrementos etc).